ఎందరివెంట నెట్లఁ దిరుగవచ్చు కందువెఱిఁగి చీఁకటి దవ్వుకొనుఁ గాక[1]	॥ఎందరి॥
తల రాయిగాఁగ నెందరికి మొక్కెడిని తెలివిమాలినయట్టి దేహి కొలఁదిమీరిన దేవకోట్లు దనలోన కలవాని నొక్కనినే కొలుచుఁ గాక	॥ఎందరి॥
కాలీచపడఁగ నెక్కడికి నేఁగెడిని పాలుమాలినయట్టి ప్రాణి మేలిమిజగములు మేనిలోఁ గలవాఁడు పాలిటివాఁడై ప్రణుతికెక్కుఁ గాక	॥ఎందరి॥
నూరేండ్ల[2] నెందరి నుతియింపఁ గలవాఁడు చేరఁ దావులేని జీవి శ్రీరమణీశుఁడు శ్రీవేంకటేశుని కోరికెఁ దలఁచి నుతి[3] కొల్లగొనుట గాక	॥ఎందరి॥

---

^[1] నిడురేకు 47- జీఁకటికిఇ దొలగుఁ.

^[2] నిడురేకు 47- నోరెండ

^[3] నిడురేకు 47- ముక్తి.