[1]అదె చూడు తిరువేంకటాద్రి నాలుగు యుగము- లందు [2]వెలుగొందీ ప్రభ మీరఁగాను	॥అదె॥
తగ నూటయిరువైయెనిమిది తిరుపతుల గల స్థానికులును చక్రవర్తి పీఠకములును అగణితంబైన [3]దేశాంత్రుల మఠంబులును నధికమై చెలువొందఁగాను మిగుల నున్నతములగు మేడలును మాడుగులు మితిలేని దివ్యతపసులున్న గృహములును వొగి [4]నొరగుఁబెరుమాళ్ళ వునికిపట్టయి వెలయు దిగువ తిరుపతి గడవఁగాను	॥అదె॥
పొదలి యరయోజనము పొడవుననుఁ బొలుపొంది పదినొండు యోజనంబుల పరపుననుఁ బరగి చెదర కేవంక చూచిన మహాభూజములు సింహశార్దూలములును కదిసి సురవరులు కిన్నరులు కింపురుషులును గరుడ గంధర్వ యక్షులును విద్యాధరులు విదితమై విహరించు విశ్రాంతదేశముల వేడుకలు దైవారగాను	॥అదె॥
యెక్కువల కెక్కువై యెసఁగి వెలసిన పెద్ద- యెక్కు డతిశయముగా నెక్కి నంతటిమీఁద అక్కజంబైన పల్లవరాయని మటము అలయేట్లపేడ గడవ\న్ చక్కనేఁగుచు నవ్వచరిఁ గడచి హరిఁ దలఁచి మ్రొక్కుచును మోకాళ్ళముడుగు గడచిన మీఁద- నక్కడక్కడ వేంకటాద్రీశు సంపదలు అంతంతఁ గానరాఁగాను	॥అదె॥
బుగులుకొను పరిమళంబుల పూవుఁదోఁటలును పొందైన నానావిధంబుల వనంబులును నిగిడి కిక్కిరిసి పండిన మహావృక్షముల- నీడలను నిలిచి నిలిచి గగనంబు దాఁకి శృంగారరసభరితమై కనకమయమైన గోపురములనుఁ జెలువొంది జగతీధరుని దివ్యసంపదలు గల నగరు సరుగననుఁ గానరాఁగాను	॥అదె॥
ప్రాకటంబైన పాపవినాశనము[5]లోని భరితమగు దురితములు పగిలి పారుచునుండ ఆకాశగంగతోయములు సోఁకిన భవము- లంతంత వీఁడి పారఁగను యీకడనుఁ గోనేట యతులుఁ బాశుపతుల్ మును- లెన్న నగ్గలమైవున్న వైష్ణవులలో యేకమై తిరువేంకటాద్రీశుఁ డాదరిని యేప్రొద్దు విహరించఁగాను	॥అదె॥

---

^[1] ఇది పెద్దపాట. రెండేసి పంక్తులొకపాదముగ, చరణమున కెనిమిది పంక్తులుగ గుర్తించుకొనవలెను.

^[2] ‘వెలుగొంది’ పూ.ము.పా.

^[3] ‘దేశాంత్రులు’ వ్యావహారికప్రీతి కిది తార్కాణ.

^[4] ఒరగుఁబెరుమాళ్ళు = పండుకొన్న గోవిందరాజస్వామి కావచ్చు.

^[5] ‘లోన’ కావచ్చు.