తనవారలు పెరవారలుఁ దాననియెడివాఁ డెవ్వఁడు తనుగుణముల దిగవిడిచిన ధన్యుం డాతఁడె పో	॥తన॥
తెగఁబడి మదనసముద్రము దేహముతోడనె దాఁటిన విగత[1]భయుం డతఁ డెవ్వఁడు [2]వీరుం డెవ్వఁడొకో పగగొని పంచేంద్రియముల ప్రాణముతోడనె బతికి జగదేకప్రీతుండగు చతురుం డాతఁడెపో	॥తన॥
యేచిన పరితాపాగ్నుల నేమియు నొవ్వక వెడలిన [3]ధీచతురుం డతఁడెవ్వఁడు ధీరుం డెవ్వఁడొకో చూచిన మోహపుఁ జూపులఁ జురుచూండ్ల కెడమియ్యని [4]రాచఱికపు నెరజాణఁడు రసికుం డాతఁడెపో	॥తన॥
చావుకు సరియగు ద్రవ్యవిచారపు తగులులఁ బాసిన పావనుఁ డెవ్వఁడు బహుజనబాంధవుఁ డెవ్వఁడొకో శ్రీవేంకటగిరినాథుని చిత్తములోపల నిలిపిన దేవసమానుఁడు నాతఁడె ధీరుఁడు నాతఁడెపో	॥తన॥

---

^[1] ‘భయుఁడ’.

^[2] ‘వీరుఁడె’ రేకు.

^[3] ఈ పాదమంతటా రేకులో డుఞ్‌స్థానికమైన సున్నల స్థానములో అరసున్నలే. అరసున్నలు అంతటా ఒక్కటే.

^[4] ‘రాచరిక’ రేకు.