ఆంధ్రభారతి - తాళ్లపాక అన్నమాచార్య కీర్తనలు - కొనరో కొనరో మీరు కూరిమిమందు - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 39-1
సంపుటము: 1-237

తాళ్లపాక అన్నమాచార్య

రాగము: శంకరాభరణం

కొనరో కొనరో మీరు కూరిమిమందు వునికి మనికి కెల్ల నొక్కటే మందు	॥కొనరో॥
ధ్రువుఁడు గొనిన మందు తొల్లియుఁ బ్రహ్లాదుఁడు చవిగాఁ గొనిన మందు చల్లని మందు భవరోగములు వీడి పారఁగఁ బెద్దలు మున్ను జవకట్టికొనిన నిచ్చలమైన మందు	॥కొనరో॥
నిలచి నారదుఁడు గొనిన మందు జనకుఁడు గెలుపుతోఁ గొని బ్రదికిన యామందు మొలచి నాలుగుయుగముల రాజులు ఘనులు కలకాలము గొని కడగన్న మందు	॥కొనరో॥
అజునకుఁ బరమాయువై ^[1]యొసగిన మందు నిజమై లోకములెల్ల నిండిన మందు త్రిజగములు నెఱఁగ తిరువేంకటాద్రిపై ధ్వజమెత్తెఁ గోనేటిదరినున్న మందు	॥కొనరో॥

^[1] ‘యెసగిన’ కావచ్చు.