ఆంధ్రభారతి - తాళ్లపాక అన్నమాచార్య కీర్తనలు - ముచ్చుఁ గన్నతల్లి చేరి మూలకు నొదిగినట్టు - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 39-4
సంపుటము: 1-240

తాళ్లపాక అన్నమాచార్య

రాగము: శ్రీరాగం

ముచ్చుఁ గన్నతల్లి చేరి మూలకు నొదిగినట్టు తెచ్చిన సంబళ మెల్లఁ దీరుఁబో లోలోనె	॥ముచ్చు॥
దప్పము చెడినవాని తరుణి కాఁగిటఁ జేరి అప్పటప్పటికి నుస్సు రనినయట్టు వొప్పయిన హరిభక్తి వొల్లనివాని యింటి కుప్పలైన సంపదలు కుళ్లుఁబో లోలోనె	॥ముచ్చు॥
ఆఁకలి చెడినవాని అన్నము కంచములోన వోఁకిలింపుచు నేల నొలికినట్టు తేఁకువైన హరిభక్తితెరువు గాననివాని వేఁకపు సిరులు కొంపవెళ్లుఁబో లోలోనె	॥ముచ్చు॥
వొడలు మాసినవాని వొనరుఁ జుట్టములెల్ల బడిబడినే వుండి పాసినయట్టు యెడయక తిరువేంకటేశుఁ దలఁచనివాని అడరుబుద్ధులు పగలౌఁబో లోలోననె	॥ముచ్చు॥