సకలశాస్త్రజ్ఞానసంపన్నుఁడట చిత్త- మొకటికినిఁ జొరదు విధియోగమౌఁ గాదో	॥సకల॥
[1]దొరతనంబట కలిమి దోడుగాదట మంచి- తరుణులట మోహమట [2]దైన్యంబట విరహమట దారిద్ర్యవివశుఁడౌనట చూడ నరయ నిది కర్మఫలమౌనో కాదో	॥సకల॥
రాజసన్మానమట రవణహీనత్వమట తేజమట నలువంకఁ [3]దిరిపెంబట వాజివాహనములట వాఁడి లేదట తొంటి- పూజఫలమిది వెలితిభోగమౌఁగాదో	॥సకల॥
యిల యెల్ల నేలునట ఇంట లేదట మిగుల బలిమిగలదట సదా పరిభవమట చెలువలర వేడుకల శ్రీవేంకటేశ్వరుని గొలువనేరని వెనకఁ గొరఁతలౌఁగాదో	॥సకల॥

---

^[1] ‘దొరతనఁబట’ రేకు.

^[2] ‘దైన్యఁబట’ రేకు.

^[3] ‘తిరిపెఁబట’ రేకు.