ఆంధ్రభారతి - తాళ్లపాక అన్నమాచార్య కీర్తనలు - సొరిది సంసారంబు సుఖమా యిందరికి - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 40-6
సంపుటము: 1-248

తాళ్లపాక అన్నమాచార్య

రాగము: ముఖారి

సొరిది సంసారంబు సుఖమా యిందరికి వెరవెఱంగక వగల వేఁగేరు గాక	॥సొరిది॥
దేహములు దలఁప సుస్థిరములా ప్రాణులకు నూహింప లోభ మట్లుండుఁ గాక మోహంబుచే వెనకముందెఱుఁగలేక తమ దేహసుఖములు మరిగి తిరిగేరు గాక	॥సొరిది॥
నెలకొన్న ద్రవ్యములు నిలుచునా యెవ్వరికి అలవి నిలుపఁగరాని యాస గాక బలువైన వట్టి విభ్రాంతిచే దగులువడి తెలిసియునుఁ దెలియ కిటు తిరిగేరు గాక	॥సొరిది॥
నెఱయు విభవములెల్ల నిజములా యిందరికి కొఱమాలినట్టి తమగుణము గాక యెఱుకతోఁ దిరువేంకటేశుఁ గొలువఁగలేక తెఱఁగుమాలిన బుద్ధిఁ దిరిగేరు గాక	॥సొరిది॥