ఆంధ్రభారతి - తాళ్లపాక అన్నమాచార్య కీర్తనలు - ఈ దేహవికారమునకు నేదియుఁ గడపల గానము - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 44-1
సంపుటము: 1-268

తాళ్లపాక అన్నమాచార్య

రాగము: లలిత

ఈ దేహవికారమునకు నేదియుఁ గడపల గానము మోదమెరంగని మోహము ముందర గననీదు	॥ఈ దేహ॥
నిత్యానిత్యవివేకము నీరసునకు నొనగూడదు సత్యాలాపవిచారము జరగదు లోభికిని హత్యావిరహితకర్మము అంటదు క్రూరాత్మునకును ప్రత్యక్షంబగు పాపము పాయదు కష్టునకు	॥ఈ దేహ॥
సతతానందవికాసము సంధించదు తామసునకు గతకల్మషభావము దొరకదు వ్యసనికిని జితకాముఁడు దా నవుటకు సిద్ధింపదు దుష్కర్మికి అతులితగంభీరగుణం బలవడ దధమునకు	॥ఈ దేహ॥
శ్రీవేంకటగిరివల్లభు సేవాతాత్పరభావము ^[1]ద్రోవ మహాలంపటులకు తోఁపదు తలఁపునకు దేవోత్తముఁడగు నీతని దివ్యామృతమగు నామము సేవింపఁగ నితరులకును చిత్తం బొడఁబడదు	॥ఈ దేహ॥

^[1] ద్రోవ = తత్పరమార్గము అని అర్థము కావచ్చు.