పండియుఁ బండదు చిత్తము పరిభవ యెడయదు కాంక్షల యెండలనే కాఁగితి మిఁక నేలాగో కాని	॥పండియు॥
పదిగోట్లు జన్మంబులఁ బాయని కర్మపుఁ బాట్లు వదలక వొక [1]నిమిషములో వడిఁదీరుచు నితఁడు చెదరని నిజదాసులకును శ్రీహరి, మా కిపుడంతక[2] హృదయము నిలువదు [3]చంచల మేలాగోకాని	॥పండియు॥
[4]కూపపు బహునరకంబుల కోట్లసంఖ్యలఁ బొరలేటి పాపము లొకనిమిషములోఁ బాపఁగఁ గలఁ డితఁడు కాపాడఁగఁ దలచిన [5]యీ కమలాపతి, నే మీతని- యేపునఁ గని మనలేమిఁక నేలాగోకాని	॥పండియు॥
జడిగొని యెన్నఁడు బాయని సంసారపు బంధంబుల విడుమని వొకనిమిషములో విడిపించును యితఁడు కడుఁ గొలిచినవారికి వేంకటపతి, నే మీతని- నెడయక కొలువఁగలేమిఁక నేలాగోకాని	॥పండియు॥

---

^[1] ‘విషయములో’ పూ.ము.పా.

^[2] అంతక = అంతవరకు కావచ్చు.

^[3] ‘చెంచెల’ రేకు.

^[4] ‘బహునరకకూపంబులకోట్లు’ అనుట సహజము. ఈ వింతసమాసములు ఈ వాఙ్మయమున గలవు.

^[5] ‘యాకమలా’ పూ.ము.పా.