ఆంధ్రభారతి - తాళ్లపాక అన్నమాచార్య కీర్తనలు - ఏమీ నెఱఁగని నాకేడ పుణ్యము - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 47-1
సంపుటము: 1-286

తాళ్లపాక అన్నమాచార్య

రాగము: ముఖారి

ఏమీ నెఱఁగని నాకేడ పుణ్యము తామసుండఁ జుమ్మీ ముందరనున్న దైవమా	॥ఏమీ॥
పాతకపుఁ జేతులనే పట్టి నిన్నుఁ బూజించు- ఘాఁతుకుఁడ నాకు నెక్కడి పుణ్యము చేతనముఁ బోదిసేయు చిత్తము నీదేకాన రాతిబొమ్మఁ జుమ్మీ భారము నీది దైవమా	॥ఏమీ॥
వూనిన యెంగిలినోర నొప్పగు నిన్నుఁ బొగడు- హీనజంతువునకు నా కేఁటిపుణ్యము తేనెవూసి నీ విట్లాఁ దిప్పఁగానే తిరిగేటి- మానిబొమ్మఁ జుమ్మీ నామతిలోని దైవమా	॥ఏమీ॥
జాలిఁబడి సంసారజలధిలో మునిఁగేటి కూళఁడ నాకేఁటి తేఁకువపుణ్యము పాలువోసి పెంచిన నాపాలి వేంకటేశ నే ^[1]తోలిబొమ్మఁ జుమ్మీ కాతువుగాని దైవమా	॥ఏమీ॥

^[1] తోలుబొమ్మ కావచ్చు. ‘తోలు’ ఔపవిభక్తికమా?