ఆంధ్రభారతి - తాళ్లపాక అన్నమాచార్య కీర్తనలు - సేవింతురా యితనిఁ జెలఁగి పరు; లిట్లనే - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 48-1
సంపుటము: 1-293

తాళ్లపాక అన్నమాచార్య

రాగము: ముఖారి

సేవింతురా యితనిఁ జెలఁగి పరు; లిట్లనే కావించె మమ్ము నెక్కడి దైవ మితఁడు	॥సేవింతు॥
పాల చవి యితఁడెఱుఁగు పాలఁ బవళించ గో- పాలుఁడని నే మితని భజియించఁగా పాలు పడి తల్లి చనుఁబాలు సహితంబు నే- కాలమునుఁ బాపె నెక్కడి దైవమితఁడు	॥సేవింతు॥
పుట్టింపఁ దానె మఱి పురుషోత్తముఁడు మంచి- పుట్టు వొసగీననుచుఁ బూజించఁగా పట్టుకొని మముఁ దెచ్చి బలిమిఁ బుట్టువులెల్లఁ గట్టిపెట్టించె నెక్కడి దైవమితఁడు	॥సేవింతు॥
కర్మకర్తారుఁడని కడలేని పుణ్యముల కర్మఫలములు దనకుఁ గైకొలుపఁగా కర్మగతిఁ దెచ్చి వేంకటవిభుఁడు మా వుభయ- కర్మములఁ జెరిచె నెక్కడి దైవమితఁడు	॥సేవింతు॥