అరిది సేఁతలే చేసి తల్లాడ నిల్లాడ సరిలేక వుండితివి జలరాశికాడ	॥అరిది॥
పొలియఁ [1]బీర్చితి వొకతిఁ బురిఁటిమంచముకాడ నలఁచితి వొకని గగనంబుకాడ బలిమిఁ దన్నితి వొకని బండిపోతులకాడఁ దులిమితివి యేడుగురఁ [2]దోలి మందకాడ	॥అరిది॥
తడవి మోదితి వొకని తాటిమాఁకులకాడ నడిచితివి వొకనిఁ బేయలకాడను పిడిచివేసితి వొకని బృందావనముకాడ వొడిసితివి వొకని నావులమందకాడ	॥అరిది॥
పటపటన దిక్కులు పగుల బగతులఁ దునిమి నటియించితివి మామనగరికాడ కుటిలబహుదైత్యాంతకుఁడవు వేంకటరాయ పుటమెగసితి జగంబులయింటికాడ	॥అరిది॥

---

^[1] ‘దీర్చితి’ పూ.ము.పా. ‘పీల్చు’ ధాతువునలు ‘పీరుచు’ అనియు వ్యవహారము గలదు.

^[2] ‘దొలి’ పూ.ము.పా.