బలువగు కర్మము లివివో జీవుల ప్రారబ్ధంబులు సంచితంబులును బలిసి తీరవివి పెరుగునేకాని బ్రహ్మల బహుకల్పంబులదాఁక	॥బలువగు॥
పాయని జన్మంబుల కర్మంబులు పాయక జీవుల ప్రారబ్ధములై యేయెడఁ జూచిన నెదిటికొలుచులై [1]యిచ్చల నిటు భుజియించఁగను కాయపుఁ బెడతటిగండఁడు విధి, దనుఁ గడతేర్చిన తన కడకర్మములు పోయి సంచితంబులఁ గలసిన, నవి పొదలుచుఁ గొండల పొడవై పెరుగు	॥బలువగు॥
పొదలి సంచితంబులు వడిఁ బెరుగును, పొలియును జీవునిపుణ్యముఁ, జాలక యెదిగిన పుణ్యం బిగురును, కాఁగిన యినుముమీఁది జలములవలెను; పదిలములై కడుఁ బాపకర్మములే బరువై పరగఁగఁ బ్రాణికి నెన్నఁడు తుదయు మొదలు నెందును లేక, వడిఁ దొలఁగక భవములతొడవై తిరుగు	॥బలువగు॥
[2]తలఁపులో నవయఁదలఁచిన జంతువు, కలుషహరుఁడు వేంకటగిరిపతి దను- దలఁచు భాగ్య మాత్మకు నొసగినఁ, జిత్తము పరిపక్వంబై యెపుడు జలజోదరు దలఁచఁగఁ బ్రారబ్ధంబులు సంచితంబులుఁ బొలిసి పుణ్యులై చెలువగు నిత్యానందపదంబునఁ జెలఁగి సుఖించగఁ జేరుదు రపుడు	॥బలువగు॥

---

^[1] ‘యిచ్చట నిటు భజి’ పూ.ము.పా.

^[2] ‘తలఁపులో మనుపఁదలచిన’ కావచ్చు. ‘స్వామి తనమనసులో కాపాడదలచిన ప్రాణిని’ అని అర్థము కావచ్చు.