పాలదొంగవద్ద వచ్చి పాడేరు తమ- పాలిటి దైవమని బ్రహ్మాదులు	॥పాల॥
రోలఁ గట్టించుక పెద్ద[1]రోలలుగా వాపోవు బాలునిముందర వచ్చి పాడేరు ఆలకించి వినుమని యంబరభాగమునందు నాలుగుదిక్కులనుండి నారదాదులు	॥పాల॥
నోరునిండా జోల్లుగార నూఁగి [2]ధూళిమేనితో పారేటి బిడ్డనివద్దఁ బాడేరు వేరులేని వేదములు వెంటవెంటఁ జదువుచుఁ[3] జేరిచేరి యింతనంత శేషాదులు	॥పాల॥
ముద్దులు మోమునఁ గార మూలల మూలల దాఁగే బద్దుల బాలునివద్దఁ బాడేరు అద్దివో శ్రీతిరువేంకటాద్రీశుఁ డితఁడని చద్దికి వేఁడికి వచ్చి సనకాదులు	॥పాల॥

---

^[1] ‘రొదలు’ కావచ్చు.

^[2] (నిడురేకు 48) నోర జొల్లుగారఁగను నూఁగు ధూళి వినుతి.

^[3] (నిడురేకు 48) సేయుచునుండ.