[1]వీఁడివో యిదె[2] వింతదొంగ వేఁడిపాలు వెన్న [3]వెరఁజిన దొంగ	॥వీఁడివో॥
వెలయ నీటఁ జొప్పువేసేటి[4] దొంగ తలగాననీక దాఁగు దొంగ తలఁకక నేల దవ్వేటి దొంగ తెలసి సందెకాడఁ దిరిగేటి[5] దొంగ	॥వీఁడివో॥
అడుగుకింద లోక మడఁచేటి[6] దొంగ అడరి తల్లికినైన నలుగు దొంగ అడవిలో నెలవైయున్న దొంగ తొడరి నీలికాసెతో నుండు దొంగ	॥వీఁడివో॥
మోస మింతుఁల జేయు మునిముచ్చు దొంగ రాసికెక్కిన గుఱ్ఱంపు దొంగ వేసాల కిటు వచ్చి వేంకటగిరిమీఁద మూసిన ముత్యమై ముదమందు దొంగ	॥వీఁడివో॥

---

^[1] ఇందు దశావతార సమన్వయము గలదు.

^[2] (నిడురేకు-35) వోయల.

^[3] (నిడురేకు-35) నెన్నలుఁబాలు.

^[4] (నిడురేకు-35) వేసిన.

^[5] (నిడురేకు-35) తిరుగాడు.

^[6] (నిడురేకు-35) మణఁచిన.