[1]కొంచెమును ఘనముఁ గనుఁగొననేల హరిఁ దలఁచు పంచమహాపాతకుఁడే బ్రాహ్మణోత్తముఁడు	॥కొంచెమును॥
వేదములు చదివియును విముఖుఁడై హరికథల నాదరించని సోమయాజికంటె యేదియునులేని కులహీనుఁడైనను విష్ణు పాదసేవకుఁడువో బ్రాహ్మణోత్తముఁడు	॥కొంచెమును॥
పరమమగు వేదాంతపఠన దొరకియు సదా హరిఁ దలఁచలేని సన్న్యాసికంటె మరిగి పసురముఁ దినెడి మాలయైనను వాఁడె పరమాత్ముఁ గొలిచినను బ్రాహ్మణోత్తముఁడు	॥కొంచెమును॥
వినియుఁ జదివియు రమావిభునిఁ దలఁపక వృథా తనువు వేఁపుచుఁ దిరుగు తపసికంటె చనవుగల వేంకటేశ్వరుదాసులకు వెంటఁ బని దిరుగు నధముఁడే బ్రాహ్మణోత్తముఁడు	॥కొంచెమును॥

---

^[1] ఈ సంకీర్తన 318వ సంకీర్తనకు అత్యల్పభేదముతోడి యనువాదమే.