ఆంధ్రభారతి - తాళ్లపాక అన్నమాచార్య కీర్తనలు - ఇందరికి నభయంబు లిచ్చుఁ జేయి - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 65-1
సంపుటము: 1-334

తాళ్లపాక అన్నమాచార్య

రాగము: సామంతం

^[1]ఇందరికి నభయంబు లిచ్చుఁ జేయి కందువగు మంచి బంగారుచేయి	॥ఇందరికి॥
వెలలేని వేదములు వెదకితెచ్చిన చేయి చిలుకుగుబ్బలికిందఁ జేర్చు చేయి కలికియగు భూకాంతఁ గాఁ(గౌ?)గిలించిన చేయి వలనైన కొనగోళ్ళ వాఁడిచేయి	॥ఇందరికి॥
తనివోక బలిచేత దానమడిగిన చేయి వొనరంగ భూదానమొసఁగు చేయి మొనసి జలనిధి యమ్ముమొనకుఁ దెచ్చిన చేయి యెనయ ^[2] నాఁగేలు ధరియించు చేయి	॥ఇందరికి॥
పురసతుల మానములు పొల్ల ^[3]సేసిన చేయి తురగంబుఁ బరపెడి దొడ్డచేయి తిరువేంకటాచలధీశుఁడై మోక్షంబు తెరువు ప్రాణులకెల్లఁ దెలిపెడి చేయి	॥ఇందరికి॥

^[1] ఇందు దశావతార సమన్వయము గలదు.

^[2] యెనసి.

^[3] పొల్లు.