చదివెఁబో ప్రాణి సకలము యీ- చదువుమీఁది [2]విద్య చదువఁడాయఁ గాని	॥చదివె॥
సిరులు చంచలమని చేఁత లధ్రువమని పరగు సంసారము బయలని తొరలిన సుఖమెల్ల దుఃఖమూలమని యెరిఁగి లోభము వీడ నెరఁగఁడాయఁ గాని	॥చదివె॥
తలకొన్న ధర్మమే[3] తలమీఁది మోఁపని వలసీ నొల్లమి దైవవశమని కలిమియు లేమియుఁ గడవఁగ[4] రాదని తెలిసి లోభము వీడఁ దెలియఁడాయఁ గాని	॥చదివె॥
యేచిన పరహితమెంతయుఁ దమ[5] దని వాచవులిన్ని [6]నెవ్వగలని యీచందమున వేంకటేశు చేఁతలని[7] చూచి లోభము వీడఁ జూడడాయఁ గాని	॥చదివె॥

---

^[1] (నిడురేకు-34) దేవగాంధారి.

^[2] ‘చదువు’ పూ.ము.పా.

^[3] కర్మమే.

^[4] గడవఁగ.

^[5] దనదని.

^[6] లెల్ల.

^[7] లన్ని చూచి యాతుమఁ దన్నుఁ జూడ.