ఆంధ్రభారతి - తాళ్లపాక అన్నమాచార్య కీర్తనలు - ఎందుఁ జూచినఁ దనకు నిన్నియును నిట్లనే - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 66-1
సంపుటము: 1-340

తాళ్లపాక అన్నమాచార్య

రాగము: శుద్ధవసంతం

ఎందుఁ జూచినఁ దనకు నిన్నియును నిట్లనే కందులేని సుఖము కలనైన లేదు	॥ఎందు॥
సిరులు గలిగిన ఫలము చింతఁ బొరలనె కాని సొరిది సంతోష మించుకయైన లేదు తరుణిగల ఫలము వేదనలఁ బొరలుటె కాని నెరసులేని సుఖము నిమిషంబు లేదు	॥ఎందు॥
తనువుగల ఫలము పాతకము సేయనె కాని అనువైన పుణ్యంబు అది యింత లేదు మనసుగల ఫలము దుర్మతిఁ బొందనే కాని ఘనమనోజ్ఞానసంగతి గొంత లేదు	॥ఎందు॥
చదువుగలిగిన ఫలము సంశయంబే కాని సదమలజ్ఞాననిశ్చయ మింత లేదు యిది యెరిఁగి తిరువేంకటేశ్వరునిఁ గొలిచినను బ్రదుకు గలుగును భవము ప్రాణులకు లేదు	॥ఎందు॥