[1]ఇత్తడి బంగారుసేయ నింతకు నేరుతునంటా కొత్తసేఁతలెల్ల దొరకొంటిగా నీవు	॥ఇత్తడి॥
హీనులైనవారు నిన్ను నేచి కొలిచిన ఘన- మైన పదవులఁ బెట్టే[2]యె(య?)టువలెనే మానక యెవ్వతెనైన మచ్చికఁ దగిలి నాతో- నానిపట్టి సరివేసే వద్దిరా నీవూ	॥ఇత్తడి॥
కడుఁ బాతకులు నిన్నుఁ గదిసి కొలిచేరంటా- నడరి పుణ్యులఁ జేయునటువలెనే కడఁగి యెవ్వతెనైన గాజు మాణికము సేసి వడి నన్నుఁ గెరలించవద్దురా నీవూ	॥ఇత్తడి॥
దిందుపడ మాయసేసి దేవుఁడ నేఁ గానంటా- నందరి భ్రమలఁ బెట్టునటువలెనే అందమైన తిరువేంకటాద్రీశ నీప్రేమ చెంది నన్నుఁ గూడి దాఁచజెల్లునా నీవూ	॥ఇత్తడి॥

---

^[1] 359, 360 పాటలు రెండూ పూర్వముద్రణమున తప్పిపోయినవి. 359వ పాట శుద్ధశృంగారసంకీర్తనములలో నుండదగినది. 360వ పాట వేదాంతవిషయోపమానములతో కూడిన శృంగారసంకీర్తనము.

^[2] యతిభంగము.