ఆంధ్రభారతి - తాళ్లపాక అన్నమాచార్య కీర్తనలు - ఇన్ని జన్మము లేఁటికి హరిదాసు- - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 70-4
సంపుటము: 1-367

తాళ్లపాక అన్నమాచార్య

రాగము: శ్రీరాగం

ఇన్ని జన్మము లేఁటికి హరిదాసు- లున్న వూరఁ దా నుండినఁ జాలు	॥ఇన్ని॥
హరిభక్తుల యింటియన్నము గొనువారి- వరువుడై వుండవలెనన్నఁ జాలు పరిమభాగవత భవనంబులఁ జెడ్డ పురువు దానయి పొడమినఁ జాలు	॥ఇన్ని॥
వాసుదేవుని భక్తవరుల దాసులు మున్ను రోసిన యెంగిలి రుచిగొన్నఁ జాలు శ్రీసతీశునిఁ దలఁచినవారి ^[1]దాసాన- దాఁసుడై వుండఁదలఁచినఁ జాలు	॥ఇన్ని॥
శ్రీవేంకటేశుఁ జూచినవారి శ్రీపాద- సేవకుఁడై ^[2]యండఁజేరినఁ జాలు యీ విభుదాసుల హితుల పాదధూళి పావనమై సోఁకి బ్రదికినఁ జాలు	॥ఇన్ని॥

^[1] ‘దాసాను’ కావచ్చు.

^[2] ‘వుండు’ రేకు.