అధ్యాత్మ సంకీర్తన
రేకు: 80-3
సంపుటము: 1-384
రేకు: 80-3
సంపుటము: 1-384
తాళ్లపాక అన్నమాచార్య
రాగము: బౌళి
| కొందరి కివి సమ్మతియైతే కొందరి కవి గావు యిందరిలోపల నీ వెడమాయలు యేగతిఁ దెలిసెద నేనయ్యా | ॥కొందరి॥ |
| దూరము కర్మమునకు జ్ఞానము; తోడనే(తొడుసే?) వొండొకటికిని దూరము; పరమునకు బ్రపంచము తొలుత విరుద్ధంబు; దూరము విరతికి సంసారము; తుద మొదలే లేదు; యీ రీతుల నీ వెడమాయలు యేగతిఁ దెలిసెద నేనయ్యా | ॥కొందరి॥ |
| కూడదు దేహమునకు నాత్మకు గోత్రవిరోధం; బెన్నఁడును కూడదు కోపమునకు శాంతము గుణావగుణములను; కూడదు బంధమునకు మోక్షము కోరికలే కట్లుగాన; యేడ గొలఁదిగా శ్రీహరిమాయలు యేగతిఁ దెలిసెద నేనయ్యా | ॥కొందరి॥ |
| శ్రీవేంకటపతి నన్నీ గతిఁ జిక్కించితి వీజగమునను; భావింపఁగరాదు నీ మహిమ బహుముఖముల యర్థముగాన; యేవిధమును నేఁటికి నాకిఁక యెందెందని తగిలెద నేను దైవికమగు నీ[1] దాసానుదాస్యము దక్కినదే నాకు | ॥కొందరి॥ |
[1] ‘దాసాన’ రేకు.