అన్నిటా నీ వంతర్యామివి అవుట ధర్మమే అయినాను యెన్నఁగ నీవొక్కఁడవే గతియని [1]యెంచి కొలుచుటే ప్రపన్న[2]సంగతి	॥అన్నిటా॥
యేకాంతంబున నుండిన పతిని యెనసి రమించుటే సతిధర్మంబు లోకము రచ్చలోనుండిన పతి లోఁగొని పైకొని(న?) రానట్లు; యీ కొలఁదులనే సర్వదేవతల యిన్నిరూపులై నీ వున్నప్పుడు కైకొని నిను బహుముఖములఁ గొలుచుట గాదు పతివ్రతధర్మంబు	॥అన్నిటా॥
పూనిన బ్రాహ్మణుల లోపలనే నినుఁ బూజించుట వేదోక్తధర్మము శ్వానకుక్కుటాదులలోపల నిను సరిఁ బూజించఁగ రానట్లు యీ నియమములనె ప్రాకృతజనులను యీశ్వర నీ శరణాగత జనులను కానక, వొక్కట సరిగాఁ [3]జూచుట కాద(ది?) వివేకధర్మంబు	॥అన్నిటా॥
శ్రీవేంకటపతి గురువనుమతినే సేవే నాకును శిష్యధర్మము ఆవలనీవల నితరమార్గములు యాత్మలోన రుచిగానట్లు, భావింపఁగ సకలప్రపంచమును బ్రహ్మం సత్యజ్ఞానమనంతము కైవశమై యిన్నిటా వెనుతగులు కాద(ది?) వివేకధర్మంబు	॥అన్నిటా॥

---

^[1] ‘యేచి కొలుచుటే’ రేకు.

^[2] ‘సుగతి’ రేకు.

^[3] ‘చూచుటకాద + వివేకధర్మంబు’ అని విభజింపవచ్చునేమో?