అధ్యాత్మ సంకీర్తన
రేకు: 81-4
సంపుటము: 1-391
రేకు: 81-4
సంపుటము: 1-391
తాళ్లపాక అన్నమాచార్య
రాగము: గుజ్జరి
| ఇటు గన సకలోపాయము లుడిగిన యీశ్వరుఁడే రక్షకుఁడు తటుకున స్వతంత్ర ముడిగిన యాత్మకు తగు నిశ్చింతమే పరసుఖము | ॥ఇటు॥ |
| ఆఁకటి కడుగని శిశువుకుఁ దల్లి యడిచి పాలు ద్రాగించిన రీతి యీ కడఁ గోరిక లుడిగిన యోగికి నీశ్వరుఁడే రక్షకుఁడు చేకొని బుద్ధెఱిఁగిన బిడ్డలపైఁ జింతింపరు తొల్లిటివలెఁ దల్లులు యీ కొలఁదులనే స్వయత్నదేహుల కీశ్వరుఁడును వాత్సల్యము వదలు | ॥ఇటు॥ |
| తతిఁ గరిరాజుఁ గాచినయట్లు ద్రౌపదిమానము గాచినయట్లు హితమతి స్వతంత్ర ముడిగిన యోగికి యీశ్వరుఁడే రక్షకుఁడు అతనుఁడు భస్మంబయ్యిననాఁడు అజుని శిరంబటు ద్రుంచిననాఁడు చతురుఁడు దా నడ్డము రాఁడాయను స్వతంత్ర ముడుగని జీవులుగాన | ॥ఇటు॥ |
| దిక్కని యనిశముఁ జిత్తములో[1]నఁ జింతించేటి శరణాగతజనులకు, యిక్కడనక్కడ శ్రీవేంకటగిరియీశ్వరుఁడే రక్షకుఁడు మక్కువతోఁ దన యంతర్యామిని మఱచిన స్వామి ద్రోహులకెల్లా అక్కరతోఁ బుట్టుగులే భోగ్యం బహంకారము విడువరుగాన | ॥ఇటు॥ |
[1] ‘లోనాఁ’ పూ.ము.పా. రేకు.