విధినిషేధములకు వెఱవఁగఁ బనిలేదు మధుసూదన నీ మన్నన దాసుఁడైతే	॥విధి॥
విడువరాని ధర్మ[1]విధుల పురుషులను విడిచి గోపికలు విచ్చనవిడి బడి నిన్ను దగులుటే పరమధర్మమాయ యెడయు నితరధర్మా లిక నేటికయ్యా	॥విధి॥
మానరాని కర్మమార్గము లటు మాని పూనిన యతులే పూజ్యులట [2]నీ నారాయణనియతే ధర్మమాయ యీ నిజ మొకటియు నెఱగఁగఁవలయు	॥విధి॥
యిన్నిట శ్రీవేంకటేశ నీ దాసుఁడై వున్న విచారాల నొదుగనేలా నిన్ను గూర్చినట్టి నిజభక్తి గలదని తిన్ననై తెలిసేటి తెలివే కలది	॥విధి॥

---

^[1] ‘విదుల’ రేకు; పూ.ము.పా.

^[2] ‘నారాయణ నీ నియతే ధర్మమాయ’ అనుట సహజము. ప్రాసనిర్బంధము కాబోలు.