ఇతరధర్మము లందు నిందు గలదా మతిఁ దలపఁ పరము నీ మతముననే కలిగె	॥ఇతర॥
విదురునకుఁ బరలోకవిధి చేసెనట తొల్లి అదె ధర్మసుతుఁడు వర్ణాశ్రమంబులు విడిచి కదిసి నీ దాసుఁడై న కతముననే కాదె యీ యెదురనే తుదిపదం బిహముననే కలిగె	॥ఇతర॥
అంటరాని గద్దకుల[1]మంటి జటాయువుకు నీ [2]వంటి పరలోకకృత్యములు సేసితివి మును వెంట నీ కైంకర్యవిధి కలిమినేకాదె వొంటి నీ హస్తమున నో(యో?)గ్యమై నిలిచె	॥ఇతర॥
యిరవైన శబరి రుచులివియె నైవేద్యమై పరగెనట శేషమును బహునిషేధములనక ధర దదీయప్రసాదపు విశేషమేకాదె సిరుల శ్రీవేంకటేశ చెల్లుబడులాయ	॥ఇతర॥

---

^[1][2] ‘అంటి’ ‘అంటి’ ఇవి పునరుక్తులు. ఇట్టి వక్కడక్కడ గలవు.