చెప్పినంత పని నేఁ జేయఁగలవాఁడ నింతే అప్పటి నపరాధమా ఆదరించవలదా	॥చెప్పినంత॥
[1]నియ్యాజ్ఞ దేహము నే మోఁచితి నింతే [2]యియ్యెడ విజ్ఞానమేల యియ్యవయ్యా [3]వెయ్యవేలై వేగుదాఁక వెట్టిసేసి యలసితి [4]వొయయ్య కొంతైనా వూరడించవలదా	॥చెప్పినంత॥
నీవు సేసే కర్మము నేఁ జేయువాఁడ నింతే యీవల నానందసుఖ మియ్యవయ్యా కోవరమై వెంటవెంటఁ గొలిచిన బంట్లకు తావులఁ గొంతవడైనా దప్పి దీర్చవలదా	॥చెప్పినంత॥
మతిలో శ్రీవేంకటేశ మనికైనవాఁడ నింతే తతి నా పాటుకు దయదలఁచవయ్యా యితవై పనిసేసేటి యింటి పసురమునకు వెతదీరఁ బాలార్చి వెడ్డువెట్టఁదగదా	॥చెప్పినంత॥

---

^[1][2][3] ‘నీ + ఆజ్ఞ.’ ‘నీ మీ’ శబ్దములపైగూడ త్రికసంధి వింత. ఈ వాఙ్మయమున యిది పలుతావుల గలదు. ‘నీయాజ్ఞ’ అని పూ.ము.పా. అట్లనే ‘యీయెడ’ ‘వేయి’ అని పూ.ము.పాఠములు. ప్రాసభంగము.

^[4] ‘వొయ్యన’ కావచ్చు. లేకున్న ప్రాసభంగము.