ఆంధ్రభారతి - తాళ్లపాక అన్నమాచార్య కీర్తనలు - వెఱ్ఱివాఁడు వెఱ్ఱిగాఁడు విష్ణుని దాస్యము లేక - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 85-3
సంపుటము: 1-413

తాళ్లపాక అన్నమాచార్య

రాగము: బౌళి

వెఱ్ఱివాఁడు వెఱ్ఱిగాఁడు విష్ణుని దాస్యము లేక విఱ్ఱవీఁగే యహంకారి వెఱ్ఱివాఁడు	॥వెఱ్ఱి॥
నాలుకపై శ్రీహరినామ మిట్టే వుండఁగాను జోలితో మఱచిన నీచుఁడే వెఱ్ఱివాఁడు అలరి యీ జగమెల్లా హరిరూపై వుండఁగాను వాలి తలపోయలేనివాఁడు వెఱ్ఱివాఁడు	॥వెఱ్ఱి॥
కూరిమి బ్రహ్మాండాలు కుక్షినున్న హరికంటే కోరి వేరే కలఁడనే కుమతి వెఱ్ఱివాఁడు చేరి తనయాత్మలోన శ్రీరమణుఁ డుండఁగాను దూరమై తిరుగువాఁడే దొడ్డవెఱ్ఱివాఁడు	॥వెఱ్ఱి॥
సారపు శ్రీవేంకటేశు శరణాగతి వుండఁగా సారెఁ గర్మములంటెడి జడుడు వెఱ్ఱివాఁడు చేరువ నాతని ముద్ర చెల్లుబడి నుండఁగా మోరతోపై వున్నవాఁడే ముందు వెఱ్ఱివాఁడు	॥వెఱ్ఱి॥