ఆంధ్రభారతి - తాళ్లపాక అన్నమాచార్య కీర్తనలు - అంతరంగమెల్లా శ్రీహరి కొప్పించకుండితే - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 89-3
సంపుటము: 1-437

తాళ్లపాక అన్నమాచార్య

రాగము: శుద్ధవసంతం

అంతరంగమెల్లా శ్రీహరి కొప్పించకుండితే వింతవింత విధముల వీడునా బంధములు	॥అంతరంగ॥
మనుజుఁడై ఫలమేది మఱి జ్ఞానియౌదాఁక తనువెత్తి ఫలమేది దయ గలుగుదాఁక ధనికుఁడై ఫలమేది ధర్మము సేయుదాఁకా పనిమాలి ముదిసితే పాసెనా భవము	॥అంతరంగ॥
చదివియు ఫలమేది శాంతము గలుగుదాఁకా పెదవెత్తి ఫలమేది ప్రియమాడుదాఁకను మదిగల్గి ఫలమేది మాధవుఁ దలఁచుదాఁకా యెదుట తా రాజైతే నేలెనా పరము	॥అంతరంగ॥
పావనుఁడై ఫలమేది భక్తి గలిగినదాఁకా జీవించేటి ఫలమేది చింత దీరుదాఁకను వేవేల ఫలమేది శ్రీవేంకటేశుఁ గన్నదాఁకా భావించి తా దేవుఁడైతేఁ బ్రత్యక్షమవునా	॥అంతరంగ॥