ఆంధ్రభారతి - తాళ్లపాక అన్నమాచార్య కీర్తనలు - వెలుపలెల్ల తనలోను గాక తను విడువదు వెడమాయా - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 91-5
సంపుటము: 1-451

తాళ్లపాక అన్నమాచార్య

రాగము: లలిత

వెలుపలెల్ల తనలోను గాక తను విడువదు వెడమాయా నలువున యోగీంద్రులెల్ల మును నడచిన మార్గంబు	॥వెలుపలెల్ల॥
జీవము నిర్జీవముగాక సిద్ధించదు పరము వావులెల్ల నొకవావిగాక మఱీ వదలదు ప్రపంచము భావంబెల్ల నభావముగాక పాయదు కర్మంబు దైవజ్ఞులు మును నడచి రిదియపో తప్పని మార్గంబు	॥వెలుపలెల్ల॥
మాటలెల్లఁ గడమాటలుగాక మాయదు మలినంబు కూటంబులు కాలకూటంబుగాక కొనకెక్కదు భవము చాటుఁదృష్ణ లగచాటునఁ బడక చాలదు సౌఖ్యంబు తేటగా మును పెద్ద లివియపో తేర్చిన మార్గంబు	॥వెలుపలెల్ల॥
గుణములెల్ల నిర్గుణముగాక తలకూడదు శాంతంబు అనువున కనువై అంతయుఁ దాఁ గాక ఆనందము లేదు ప్రణుతింపఁగ శ్రీవేంకటరమణుని బహుళమహిమెల్లా గణనకెక్కఁగా పురాతనులు మును కడకట్టిన మతము	॥వెలుపలెల్ల॥