[1]పొడవైన శేషగిరి బోయనాయఁడు విడువ కిందరిఁ గాచు వెడబోయనాయఁడు	॥పొడవైన॥
పొలసి మీసాల పెద్దబోయనాయఁడు మలిగి వీఁపునఁ గట్టే మంకుబోయనాయఁడు పొలమురాజై [2]తిరిగే బోయనాయఁడు వెలయ [3]మోటుననుండే వేఁటబోయనాయఁడు	॥పొడవైన॥
పొట్టిపొట్టియడుగుల బోయనాయఁడు యెందుఁ బుట్టుపగసాధించే బోయనాయఁడు బొట్టులమెకము నేసే బోయనాయఁడు పట్టపునెమలిచుంగు బలుబోయనాయఁడు	॥పొడవైన॥
పొంచి శిగ్గెగ్గెఱఁగని బోయనాయఁడు మించి రాలమీఁద దాఁటే మెండుబోయనాయఁడు అంచెల శ్రీవేంకటేశుడనే బోయనాయఁడు పంచఁ గాలవేలముల బలుబోయనాయఁడు	॥పొడవైన॥

---

^[1] ఇందు దశావతార సమన్వయము గలదు.

^[2] ‘తిరిగీ’ పూ.ము.పా.

^[3] మోటు = స్తంభమా?