సర్వజ్ఞత్వము వెదకఁగ నొల్లను సందేహింపఁగ నొల్లను సర్వజ్ఞుండును నాచార్యుండే సర్వశేషమే నా జీవనము	॥సర్వజ్ఞ॥
యెఱఁగఁగ నొల్లము విజ్ఞానపుగతి యెఱుకలు నే మిటు [1]సోదించి యెఱిఁగి యితరులను బోధించెదమను యీపెద్దరికము నొల్లము యెఱిఁగేటివాడును యాచార్యుండే, యెఱుకయు సర్వేశ్వరుఁడే యెఱుకయు మఱపును మానివుండుటే యిదియేపో మా విజ్ఞానము	॥సర్వజ్ఞ॥
చదువఁగ నొల్లము సకలశాస్త్రములు సారెకు సారెకు [2]సోదించి చదివి పరులతో యుక్తివాదములు జగడము గెలువగ నొల్లము చదివేటివాఁడును నాచార్యుండే, చదువును నా యంతర్యామే చదువుకుఁ జదువమికియు దొలఁగుటే నానాసాత్వికభావమే నా తెలివి	॥సర్వజ్ఞ॥
అన్నిటికిని నే నధికారిననెడి యహంకారము నొల్లను కన్నుల జూచుచు [3]నందరితో నేఁ గాదని తొలఁగానొల్లను మన్నన శ్రీవేంకటేశ్వరు కరుణను మా యాచార్యుఁడే అధికారి వున్నరీతినే అస్తినాస్తులకు నూరకుండుటే నా తలఁపు	॥సర్వజ్ఞ॥

---

^[1][2] ‘సోధించి’ రేకు పూ.ము.పా.

^[3] ‘నందరితోనేఁ గాదని’ పూ.ము.పా.