ఆంధ్రభారతి - తాళ్లపాక అన్నమాచార్య కీర్తనలు - కాయమనే వూరికి గంతలు తొమ్మిదియాయ - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 97-6
సంపుటము: 1-488

తాళ్లపాక అన్నమాచార్య

రాగము: బౌళి

కాయమనే వూరికి గంతలు తొమ్మిదియాయ పాయక తిరిగాడేరు పాపపు తలారులు	॥కాయమనే॥
కాముఁడనియెడి రాజు గద్దెమీఁద నుండఁగాను దీము గోపపు ప్రధాని దిక్కు లేలీని కోమలపు జ్ఞానమెల్లాఁ గొల్లఁబోయ నాడనాడ గామిడులై రింద్రియపుఁ గాపులెల్లా నిదివో	॥కాయమనే॥
చిత్తమనే దళవాయి చింతలనే పౌఁజు వెట్టి యిత్తల విషయములు యెన్నికిచ్చిరి తుత్తుమురై కోరికెల దొండెము రేఁగఁగఁ జొచ్చె జొత్తుల వెరగుపడి చూచీఁ బుట్టుగులు	॥కాయమనే॥
బలుసంసారమనేటి భండారము ఘనమాయ కలదీగి జవ్వనపు కైజీతము యిలలో శ్రీవేంకటేశుఁ డింతలో జీవుఁడనేటి బలువుని రాజుఁ జేసి పాలించె నన్నును	॥కాయమనే॥