సంసారినైన నాకు సహజమే కంసారి నే నిందుకెల్లాఁ గాదని వగవను	॥సంసారి॥
నరుఁడనైన నాకు నానాసుఖదుఃఖములు సరి ననుభవించేది సహజమే హరిని శరణాగతులైనమీఁద బరాభవ- మరయ నిన్నంటునని అందుకే లోఁగేను	॥సంసారి॥
[1]పుట్టిన నాకు గర్మపు [2]పొంగుకు లోనైనవాఁడ జట్టిగాఁ గట్టువడుట సహజమే యిట్టే నీవారికి మోక్షమిత్తునన్న నీమాట పట్టు [3]వోయీనోయని పంకించే నే నిపుడు	॥సంసారి॥
మాయకు లోనైన నాకు మత్తుఁడనై యిన్నాళ్లు చాయకు రానిదెల్లా సహజమే యీ యెడ శ్రీవేంకటేశ యేలితివి నన్ను నీవు మోయరాని నేను నీకు మోపని వీఁగేను	॥సంసారి॥

---

^[1] కారకాన్వయ మంతగా సరిలేదు.

^[2] ‘పోఁగు’ రేకు.

^[3] ‘వోయినో’ రేకు, పూ.ము.పా.