ఎదుట నెవ్వరు లేరు యింతా విష్ణుమయమే వదలక హరిదాసవర్గమైనవారికి	॥ఎదుట॥
ముంచిన నారాయణమూర్తులే యీ జగమెల్ల అంచితనామములే యీ యక్షరాలెల్లా పంచుకొన్న శ్రీహరిప్రసాద మీ రుచులెల్లా తెంచివేసి మేలు దాఁ దెలిసేటివారికి	॥ఎదుట॥
చేరి పారేటి నదులు శ్రీపాదతీర్థమే భారపు యీ [1]భూమెతని పాదరేణువే సారపుఁ గర్మములు కేశవుని కైంకర్యములే ధీరులై వివేకించి తెలిసేటివారికి	॥ఎదుట॥
చిత్తములో భావమెల్లా శ్రీవేంకటేశుఁడే హత్తిన ప్రకృతి [2]యెల్లా నాతని మాయే మత్తిలి యీతనికంటే మరి లే దితరములు తిత్తిదేహపు బ్రదుకు తెలిసేటివారికి	॥ఎదుట॥

---

^[1] ‘భూమితని’ పూ.ము.పా. ‘భూమి + అతని’ ఇట్టి సంధు లీవాఙ్మయమున కొల్లలు.

^[2] ‘యల్లా’ రేకు.