ఆంధ్రభారతి - తాళ్లపాక అన్నమాచార్య కీర్తనలు - ఇన్నిటికి మూలము యీతనిరూపు - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
శ్రీరంగం రేకు: 98-1
సంపుటము: 1-507

తాళ్లపాక అన్నమాచార్య

రాగము: సామంతం

^[1]ఇన్నిటికి మూలము యీతనిరూపు యెన్నఁగ నుపమలకు నిరవైనట్లుండె	॥ఇన్నిటికి॥
కమలనాభునికి కప్పురకాపు మేన సముచితముగఁ బైపై చాఁతినపుడు అమృతము దచ్చేవేళ నట్టే మేనఁ దుంపుర్లు తమితోడ నిండుకొని దట్టమైనట్లుండె	॥ఇన్నిటికి॥
దైవశిఖామణికి తట్టుపుణుఁగు మేనను చేవమీర నించి సేవ సేసేయప్పుడు వేవేలుగా యమునలో వేమారు నీఁదులాడఁగా కావిరి కాళిమ నిండాఁ గప్పినయట్టుండె	॥ఇన్నిటికి॥
అలుమేలుమంగతోడ నట్టే శ్రీవేంకటపతి- కెలమితో సొమ్మువెట్టి యెంచినపుడు కులికి గొల్లెతలను కూడఁగా గుబ్బలమీఁదఁ గల పసపెల్లా వచ్చి కమ్ముకొన్నట్లుండె	॥ఇన్నిటికి॥

^[1] ఈ పాటలెల్లా స్వామి మజ్జనమును వర్ణించినవే. ఆ స్నానవేళ స్వామిలో అక్కడక్కడ కనబడిన శృంగారరేఖలు, అధ్యాత్మమునకును సహజములే.