ఆంధ్రభారతి - తాళ్లపాక అన్నమాచార్య కీర్తనలు - నేమే బ్రహ్మమనుకో నేరము నేము - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 105-6
సంపుటము: 2-30

తాళ్లపాక అన్నమాచార్య

రాగము: ముఖారి

నేమే బ్రహ్మమనుకో నేరము నేము- కామించిన స్వతంత్రము గడు లేదుగాన	॥పల్లవి॥
క్షణములోపలనె సర్వజీవావస్థలూను గణుతించేవాఁ డొకఁడు గలఁడు వేరే అణుమహత్త్వములందు నంతర్యామైనవాని ప్రణుతించి దాసులమై బ్రదికేముగాని	॥నేమే॥
పనిగొని యేలుటకు బ్రహ్మాది దేవతలఁ గనిపించేవాఁ డొకఁడు గలఁడు వేరే ననిచి సిరుల లక్ష్మీనాథుఁడైనవాని- పనులవారము నేము బ్రదికేముగాని	॥నేమే॥
సతతరక్షకుఁడయి శంఖచక్రధరుఁడయి గతి శ్రీవేంకటపతి గలఁడు వేరే అతనిమఱఁగు చొచ్చి యానందపరవశానఁ బ్రతిలేక యిందరిలో బ్రదికేము గాని	॥నేమే॥