ఆంధ్రభారతి - తాళ్లపాక అన్నమాచార్య కీర్తనలు - నారాయణాచ్యుతానంత గోవిందా - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 109-6
సంపుటము: 2-54

తాళ్లపాక అన్నమాచార్య

రాగము: గుండక్రియ

నారాయణాచ్యుతానంత గోవిందా నేరరాదు విజ్ఞానము నీ వియ్యక లేదు	॥పల్లవి॥
నిగమాంతవిదులై తే నిన్నెఱుఁగుదురు గాక మృగసమానులకేల మీమీఁది భక్తి వెగటుగాఁ గృపతోడ విశ్వరూపు చూపినాను పగటు దుర్యోధనుఁడు బహురూప మనఁడా	॥నారా॥
చిరపుణ్యులైతే మీ సేవలు సేతురు గాక దురితచిత్తులకు మీత్రోవ యేఁటికి గరిమఁ బ్రత్యక్షమై కంబములోఁ గలిగినా హిరణ్యకశిపుఁడు మిమ్మెంచి శరణనెనా	॥నారా॥
దేవతలయితే మిమ్ముఁ దెలియనేర్తురు గాక యేవల నసురులు మిమ్మెఱిఁగేరా శ్రీవేంకటాద్రిమీఁద సిరితో నీ వుండఁగాను కేవల సంసారు లెఱిఁగియును మఱవరా	॥నారా॥