ఆంధ్రభారతి - తాళ్లపాక అన్నమాచార్య కీర్తనలు - సకల బలంబులు నీవే సర్వేశ్వర నాకు - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 119-1
సంపుటము: 2-109

తాళ్లపాక అన్నమాచార్య

రాగము: లలిత

సకల బలంబులు నీవే సర్వేశ్వర నాకు అకలంకంబగు సుఖమే అన్నిట నిదే నాకు	॥పల్లవి॥
పొందుగఁ జక్రాంకితమే బుజబలమిదె నాకు అందిన హరి నీచింతే ఆత్మబలము నాకు సందడిఁ బేరుబలము కేశవనామము నాకు యిందును నందును భవభయ మిఁక లేదిదే నాకు	॥సక॥
అంగపుఁ దిరుమణు లివి పంచాంగబలము నాకు సంగతి నీపై పాటలె స్వరబలిమిదే నాకు రంగుగ నీగుణరాసులే రాసిబలము నాకు యింగితముగ నిహపరముల కెదురేదిదే నాకు	॥సక॥
కనుఁగొను నీవిగ్రహమే గ్రహబలిమిదె నాకు విను నీదాసుల సేవే వెనుబలిమిదె నాకు తనరిన శ్రీవేంకటపతి దైవబలము నాకు ఘనమే చెప్పఁగ నింతటఁ గలిగెబో యిదే నాకు	॥సక॥