ఆంధ్రభారతి - తాళ్లపాక అన్నమాచార్య కీర్తనలు - ఇంతదేవుఁ డింక వేఁడీ యెంచి చూపుఁడా - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 120-2
సంపుటము: 2-116

తాళ్లపాక అన్నమాచార్య

రాగము: దేసాక్షి

ఇంతదేవుఁ డింక వేఁడీ యెంచి చూపుఁడా చెంతనుండితే రక్షించు చేకొని కొలువరో	॥పల్లవి॥
వేసితే వేయురూపులు విశ్వరూప మితఁడు శ్రీసతీశుఁ డిందరిలో శ్రీమంతుఁడు భాసురపు భూమి మోచే బలవంతుఁ డిన్నిటాను దాసులైతే మన్నించు నీదైవముఁ గొలువరో	॥ఇంత॥
గుట్టున బ్రహ్మాండాలు కుక్షిలో నించినవాఁడు అట్టె దేవతల మొర లాలించేవాఁడు చిట్టకపు దానవుల చించి చెండాడేటివాఁడు ఇట్టే శరణంటేఁ గాచు నీతనిఁ గొలువరో	॥ఇంత॥
కాలముఁ గర్మము మాయ గల్పించినయట్టివాఁడు ఆలించి సర్వజీవుల‌ అంతర్యామి వాలి శ్రీవేంకటపతై వరములిచ్చేటివాఁడు యేలీలఁ గొల్చిన మెచ్చు నీవిభుఁగొలువరో	॥ఇంత॥