ఆంధ్రభారతి - తాళ్లపాక అన్నమాచార్య కీర్తనలు - ఏది వలసె నీవది సేయు యిందులోన నో జీవాత్మ - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 132-2
సంపుటము: 2-128

తాళ్లపాక అన్నమాచార్య

రాగము: బౌళి

ఏది వలసె నీవది సేయు యిందులోన నో జీవాత్మ పాదగు మనలో నంతరాత్మయై పరగిన శ్రీహరి పనుపునను	॥పల్లవి॥
మనవంటి జీవులే మహిలోన నొక కొన్ని శునకములై కుక్కుటములై సూకరములు నైనవి దినదినముఁ గర్మపాశములఁ దిరిగెడి దుర్దశ లటుచూడు సనకాదులై కొందరు జీవులు శౌరిదాసులై రటుచూడు	॥ఏది॥
కన్నులుఁ గాళ్ళు మనవలెఁ దనువులు గైకొని కొందరు నరులు పన్నిన తొత్తులు బంట్లునై మనపనులు సేయుచునున్నారు యెన్నఁగ శ్రీహరి నెఱఁగక యిడుములఁ బొరలెడి దది చూడు మున్నె హరిదాసులై నారదముఖ్యులు గెలిచిన దది చూడు	॥ఏది॥
యింతగాలమును యీపుట్టుగులనె యిటువలెఁ బొరలితి మిన్నాళ్ళు యింతట శ్రీవేంకటేశుఁడు దలంచి యీ జన్మంబున మము నేలె వింతల బొరలిన నరకకూపముల వెనకటి దైన్యములటు చూడు సంతసమున ముందరిమోక్షము సర్వానందంబది చూడు	॥ఏది॥