ఆంధ్రభారతి - తాళ్లపాక అన్నమాచార్య కీర్తనలు - ఇహమేకాని యిఁకఁ బరమేకాని - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 132-5
సంపుటము: 2-131

తాళ్లపాక అన్నమాచార్య

రాగము: లలిత

ఇహమేకాని యిఁకఁ బరమేకాని బహుళమై హరి నీపై భక్తే చాలు	॥పల్లవి॥
యెందు జనించిన నేమి యెచ్చోట నున్న నేమి కందువ నీదాస్యము గలిగితేఁ జాలు అంది స్వర్గమేకాని అల నరకమేకాని అందపు నీనామము నా కబ్బుటేచాలు	॥ఇహ॥
దొరయైనఁ జాలు గడుఁ దుచ్ఛపు బంటైనఁ జాలు కరఁగి నిన్నుఁ దలఁచఁగలితేఁ జాలు పరులు మెచ్చిన మేలు పమ్మి దూషించిన మేలు హరి నీసేవాపరుఁడౌటే చాలు	॥ఇహ॥
యిలఁ జదువులు రానీ యిటు రాక మాననీ తలఁపు నీపాదముల తగులే చాలు యెలమి శ్రీవేంకటేశ యేలితివి నన్ను నిట్టె చలపట్టి నాకు నీశరణమే చాలు	॥ఇహ॥