అధ్యాత్మ సంకీర్తన
రేకు: 133-2
సంపుటము: 2-133
రేకు: 133-2
సంపుటము: 2-133
తాళ్లపాక అన్నమాచార్య
రాగము: శ్రీరాగం
| ఇంతయు నీమాయామయ మేగతిఁ దెలియఁగ వచ్చును దొంతిఁబెట్టిన కుండలు తొడరిన జన్నములు | ॥పల్లవి॥ |
| కలలోపలి సంభోగము ఘనమగు సంపద లిన్నియు వలలోపలి నిడిపరులు వన్నెల విభవములు తలఁపునఁ గలిగియు నిందునే తగులకపో దెవ్వరికిని తెలిసినఁ దెలియదు యిదివో దేవరహస్యంబు | ॥ఇంత॥ |
| అద్దములోపలి నీడలు అందరి దేహపురూపులు చద్దికి వండిన వంటలు జంటఁగర్మములు పొద్దొకవిధమయి తోఁచును భువి నజ్ఞానాంబుధిలో- నద్దిన దిది దెలియఁగరా దంబుదముల మెఱుఁగు | ॥ఇంత॥ |
| మనసునఁ దాగినపా లివి మదిఁగల కోరిక లిన్నియు యినుమున నిగిరిననీళ్లు యిల నాహారములు పనివడి శ్రీవేంకటగిరిపతి నీదాసు లివిన్నియు కని మని విడిచిన మనుజుల కాయపు మర్మములు | ॥ఇంత॥ |