ఆంధ్రభారతి - తాళ్లపాక అన్నమాచార్య కీర్తనలు - వెలుపల మఱవక లోపల లేదు వెలుపలఁ గలిగిన లోపల మఱచు - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 134-1
సంపుటము: 2-137

తాళ్లపాక అన్నమాచార్య

రాగము: రామక్రియ

వెలుపల మఱవక లోపల లేదు వెలుపలఁ గలిగిన లోపల మఱచు చలమున నిదియే ఘడియ ఘడియకును సాధించిన సుఖమటు దోఁచు	॥పల్లవి॥
వెలుపలి వెలుఁగే చూడఁగ లోపలి వెడ చీఁకటి గాననియట్లు అలరి ప్రపంచజ్ఞానికిఁదనలో నాత్మజ్ఞానము గనరాదు పలుమరు చీఁకటి చూడఁగఁ జూడఁగ బయలే వెలుఁగై తోఁచినయట్లు అలయక తనలోచూపు చూచినను అంతరంగమున హరిఁ గనును	॥వెలు॥
జాగరమే కడుఁ జేయఁగఁ జేయఁగ సతతము నిద్దుర రానట్లు చేగల నింద్రియములలోఁ దిరిగిన చిత్తవికారము లయపడదు యీగతి నిద్దురవోఁగాఁ బోఁగా నిలలో సుద్దులు యెఱఁగనియట్టు యోగపు టేకాంతంబును దన మనసొగి మరవఁగ మరవఁగ హరిఁ గనును	॥వెలు॥
దేహపు టాకాశపు నిట్టూర్పులు బాహిరపు బయట నడగినయట్లు ఆహ జీవుని జననమరణములు అందే పొడముచు నందడఁగు వూహల శ్రీవేంకటపతి వాయువు కొగి నాకాశము వొక్క సూత్రము ఆహా ప్రాణాపానవాయువులు ఆతుమ నిలుపుటే హరిఁ గనుట	॥వెలు॥