ఆంధ్రభారతి - తాళ్లపాక అన్నమాచార్య కీర్తనలు - ఇందరిలో నేమెందుఁ బోలుదుము యిందరిఁ బోలిన జీవులమే - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 134-2
సంపుటము: 2-138

తాళ్లపాక అన్నమాచార్య

రాగము: గుజ్జరి

ఇందరిలో నేమెందుఁ బోలుదుము యిందరిఁ బోలిన జీవులమే కందువ వీరలఁ దలఁచి చిత్తమిది కలఁగెడి దైవమ కావఁగదే	॥పల్లవి॥
యెందరొకో జరాదుఃఖము లేచి యనుభవించేటివారు యెందరొకో దరిద్రదుఃఖము లెఁసగి యలమటించేటివారు యెందరొకో బంధనతాడనహీనదెసల నుండెడివారు యెందరొకో దాసదాస్యవిధి నెడయరాక చెఱలయినవారు	॥ఇంద॥
యెందరొకో మరణదెసలచే నిల సంయోగవియోగదుఃఖితులు యెందరొకో జన్మరోగముల నెక్కువ భయమందేటివారు యెందరొకో రాజుల చోరుల హింసలకు లోన యినవారు యెందరొకో పొడమిన జీవుల కెక్కడ నెక్కడ నేపాటో	॥ఇంద॥
యెందరొకో యీదుఃఖనివృత్తికి యెడసి మిమ్ముఁ గొలిచినవారు యెందరొకో సంపదలకు లోనై యేతాయాతనఁ బడువారు యెందరొకో శ్రీవేంకటేశ యిపు డెక్కువ నీశరణము చొచ్చి యిందును నందును సుఖులై లోకుల నిందరిఁ జూచుచు నవ్వెడివారు	॥ఇంద॥