ఆంధ్రభారతి - తాళ్లపాక అన్నమాచార్య కీర్తనలు - తలగరో లోకులు తడవకురో మమ్ము - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 135-3
సంపుటము: 2-144

తాళ్లపాక అన్నమాచార్య

రాగము: లలిత

తలగరో లోకులు తడవకురో మమ్ము కలిగినదిది మా కాఁపురము	॥పల్లవి॥
నరహరికీర్తన నానిన జిహ్వ వొరుల నుతింపఁగ నోపదు జిహ్వ మురహరు పదములు మొక్కిన శిరము పరుల వందనకుఁ బరగదు శిరము	॥తల॥
శ్రీపతినే పూజించిన కరములు చోఁపి యాచనకుఁ జొరవు కరములు యేపున హరికడ కేఁగిన కాళ్ళు పాపుల యిండ్లకుఁ బారవు కాళ్ళు	॥తల॥
శ్రీవేంకటపతిఁ జింతించు మనసు దావతి నితరముఁ దలఁచదు మనసు దేవుఁడతని యాధీనపు తనువు తేవల నితరాధీనము గాదు	॥తల॥