ఆంధ్రభారతి - తాళ్లపాక అన్నమాచార్య కీర్తనలు - దేహ మిది యొకటే దేవుఁడ నీవొకఁడవే - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 138-4
సంపుటము: 2-163

తాళ్లపాక అన్నమాచార్య

రాగము: గుండక్రియ

దేహ మిది యొకటే దేవుఁడ నీవొకఁడవే యీహల రెంట దెప్పర మిదివో మాబదుకు	॥పల్లవి॥
రాతి రొక్కలోకము రవ్వపడెఁ గలలోన ఘాతలఁ బగలొక్కలోకము వేగితే యీతల రెప్పలే మరఁ గిందుకు నందుకుఁ జూడ యేతుల రెంట దెప్పర మిదివో మాబదుకు	॥దేహ॥
సతి కాఁగిలొకటే జవ్వనపుఁగాఁక రేఁచు సుత కాఁగిలొక వేరేసుఖమై తోఁచు మతిలోని మరఁ గింతే మగువలే యిద్దరును ఇతవై రెంట దెప్పర మిదివో మాబదుకు	॥దేహ॥
దైవమా నిన్నాతుమలోఁ దలఁచి యానందింతు పూవుల నిన్నుఁ బూజింతు పొంచి వెలిని శ్రీవేంకటేశ నీసేవలోని మరఁ గింతే యీవల రెంట దెప్పర మిదివో మాబదుకు	॥దేహ॥