అధ్యాత్మ సంకీర్తన
రేకు: 140-2
సంపుటము: 2-173
రేకు: 140-2
సంపుటము: 2-173
తాళ్లపాక అన్నమాచార్య
రాగము: ముఖారి
| ఏరీతి నెవ్వరు నిన్ను నెట్టు భావించినాను వారివారి పాలికి వరదుఁడవౌదువు | ॥పల్లవి॥ |
| చేరికొల్చినవారికిఁ జేపట్టుఁ గుంచమవు కోరి నుతించినవారికి కొంగుపైఁడివి మేరతోఁ దలఁచువారి మేటినిధానమవు సారపు వివేకులకు సచ్చిదానందుఁడవు | ॥ఏరీ॥ |
| కావలెననేవారికి కామధేనువవు మరి సేవసేసేవారికి చింతామణివి నీవే గతెన్నవారికి నిఖిల రక్షకుఁడవు వావిరి శరణువేఁడేవారి భాగ్యరాశివి | ॥ఏరీ॥ |
| నిన్నుఁ బూజించేవారి నిజపరతత్త్వమవు ఇన్నిటా నీదాసులకు నేలికెవు యెన్నఁగ శ్రీవేంకటేశ యిహపరములకును పన్ని కాచుకున్నవారి ఫలదాయకుఁడవు | ॥ఏరీ॥ |