ఆంధ్రభారతి - తాళ్లపాక అన్నమాచార్య కీర్తనలు - దైవమా నీపెరరేఁపణ లివి తప్పక వున్నవి జీవులకు - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 143-2
సంపుటము: 2-190

తాళ్లపాక అన్నమాచార్య

రాగము: మలహరి

దైవమా నీపెరరేఁపణ లివి తప్పక వున్నవి జీవులకు భావించి కాదని దొబ్బి దీకొనఁగ బ్రహ్మాదులకైనను వసమా	॥పల్లవి॥
యెక్కడ సిద్ధించు బ్రహ్మచర్యము యెదుటనే కాంతలఁ జూచినవేళను చక్కఁగా మనోవ్యభిచారంబునఁ జలియించుం గాక చిక్కునే విరతి ధనధాన్యంబులు చేతికి లోనయినఁ జూచి వొక్కటియై తా నండే మగ్నమునొందించుం గాక	॥దైవ॥
కలుగునే తనివి బహుపదార్థములు గక్కన నంగళ్లనుఁ జూచి కొలఁదిమీఱఁ గడుతరితీపులతో కోరుచు నోరూరుం గాక వలనుగ సమాధి యెటువలె దొరకొను వాజవారణంబులఁ జూచి యెలమితోడ ముంగిళ్లనెల్లఁ జరియింపించుఁ గాక	॥దైవ॥
యేరీతి నెలకొను నీమీఁదితలఁపు యిహలోకపుసౌఖ్యము చూచి భారపు లంపటములు పై దగిలించి పనులకుఁ బురికొలుపుఁ గాక ధారుణి నే నివి గెలుచుట యెన్నఁడు తగ శ్రీవేంకటనాయక నీవే గారవించి రక్షింపుము నీ కిది కడునుపకారంబౌఁ గాక	॥దైవ॥