ఆంధ్రభారతి - తాళ్లపాక అన్నమాచార్య కీర్తనలు - ఇందరి బ్రదుకులును యీశ్వరుని చేతి దే - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 143-5
సంపుటము: 2-193

తాళ్లపాక అన్నమాచార్య

రాగము: దేసాళం

ఇందరి బ్రదుకులును యీశ్వరుని చేతి దే యెందూ సుజ్ఞానులు నిన్నే యెఱిఁగి కొలిచిరి	॥పల్లవి॥
నినుఁ గనుఁగొనలేక నీచేఁత దెలియక మనుజులదృష్టమని మది నెంతురు అనిశము నీసృష్టి యిట్లని నిశ్చయించరాక తనరఁ గొందరు తమతమ కర్మ మందురు	॥ఇంద॥
మహి నీలీల లెంచక మహిమలు దెలియక బహుగతి జగత్తు స్వభావ మందురు నిహితమై నీ వింతటా నిండుకుండుట చూడక తహతహఁ గొందరు యింతా మిథ్య యందురు	॥ఇంద॥
భావములోన నిన్ను భావించ వసముగాక ఆవల నిరాకారమని యందురు శ్రీవేంకటేశ నీవు చేరి యెదుట నుండఁగా దేవుఁడు మనవాఁడుగా తెలిసితి మందురు	॥ఇంద॥